শৈশৱতে ধেমালিতে

শৈশৱতে ধেমালিতে
তোমাৰে ওমলা মনত আছে
ব’হাগ মাহৰ লুইতখনিত
দুয়ো সাঁতোৰা মনত আছে ।
যৌৱনতে দুয়োৰে দেহাৰ
লাজুকী পৰশ মনত আছে ।
মোৰ অবিহনে চিপজৰী ল’বা
বুলি কোৱা মোৰ মনত আছে ।
ব’হাগ মাহৰ লগতে এদিন
আহিল বৰদৈচিলা‍!
সেই ধুমুহাত কাৰোবাৰ স’তে
তুমি দেখো গুচি গ’লাঁ ।
মনৰ গৰাকী এৰি তুমি
ধনৰ গৰাকী বৰিলাঁ
ধন ধন বুলি ধনৰ প্রেমেৰে
স্বৰূপ প্রকাশ কৰিলাঁ !
বহুদিন গ’ল হঠাতে সিদিনা
তোমাক দেখা মনত আছে
আঁতৰৰ পৰা দেখিলোঁ
তোমাৰ স্বর্ণ গহনা জিলিকিছে ।
তোমাৰ অবিহনে চিপজৰী ল’ম
বুলি যদি তুমি ভাবিছাঁ
ভুল কৰিছা সোণজনী মোৰ
অলীক সপোন দেখিছাঁ ।
কথা : জীয়াই থাকিম–
গীত : জীয়াই থাকি এখন সমাজ
গঢ়িবৰ মোৰ মন আছে
অʼ জীয়াই থাকি এখন সমাজ
গঢ়িবৰ মোৰ পণ আছে
য’ত –সোণতকৈয়ো মানুহৰ দাম
অলপ হ’লেও বেছি আছে,
অলপ হ’লেও বেছি আছে।
অলপ হ’লেও বেছি আছে।
অলপ হ’লেও বেছি আছে ।