কোনে কয় মই অকলশৰীয়া (মই আৰু মোৰ ছাঁ)

কোনে কয় মই অকলশৰীয়া
মই আৰু মোৰ ছাঁ
দুয়ো দুয়োৰে লগৰীয়া
পৃথিৱী নক’বা মই অকলশৰীয়া

সংগীহীনতা
মোৰেই সংগী
বুলি কিয় তুমি উপহাস কৰিছা ?
মই আৰু মোৰ ছাঁ
দুয়ো দুয়োৰে লগৰীয়া
মই আৰু মোৰ ছাঁ।।

দূৰণিৰ বন্ধু সকলো মিছা
নিচেই কাষৰে ছাঁহে সঁচা,
মই আৰু মোৰ ছাঁ — ।
দুয়ো দুয়োৰে লগৰীয়া
মই আৰু মোৰ ছাঁ — ।

আশাৰ বালিচৰত
যেতিয়া ঘৰ সাজোঁ
মোৰেই ছাঁই বালি তুলি দিয়ে ।
এন্ধাৰ বাটতে মোৰেই ছাঁই
মেলি দিয়ে নিতে জ্যোতিৰ দলিচা

মই আৰু মোৰ ছাঁ
দুয়ো দুয়োৰে লগৰীয়া
পৃথিৱী নক’বা মই অকলশৰীয়া
মই আৰু মোৰ ছাঁ ।।